طعمية مصرية في الكبة

📝طريقة التحضير

1. 1

   نغسل الفول كويس وننقعه ١٢ساعة في مية مع مراعاة تغيير الماء كل ٤ ساعات عشان نطلع كل الغازات الضارة من الفول وكمان يكون طري معانا في الشغل

2. 2

   بعد ما نصفي الفول من الماء هنلاحظ حبات الفول كبرت وبقت جاهزة هنحطها في الكبة ونفرمها فرم متوسط مش ناعم اوي عشان هنفرمها مرة كمان مع الخضار

3. 3

   بعد ما الفول اتفرم نحط البصل والثوم وشوية خضرة صغيرين ممكن تتعمل بكسبرة وشبت بس وممكن تتعمل بكرات بس وممكن ببصل اخضر كلهم احلى من بعض بس انا بفضل الكرات بيكون طعمه اقوي وزي بتاعة المحلات بالظبط

4. 4

   ملحوظة: الخضار انا محددتش كميته عشان هو بالتقريب كدا بنحط شوية بشوية لحد ما نوصل للون العجينة المطلوب المفروض تكون فاتحة جداً مش خضرا عشان متسودش مننا في القلية في نضيف الخضار اخر حاجة عودين بعودين ونفرم ونشوف اللون

5. 5

   بعد ما العجينة كلها امتزجت ببعض كدا احنا بقي عندنا عجينة طعمية جاهزة للتفريز هنقسمها في اكياس تلاجة ونخزنها في الفريزر

6. 6

   ملحوظة ٢: عجينة الطعمية مبتتبلش غير وقت القلي عشان بردو متسودش منك في التحمير بتتحفظ في الفريزر بدون توابل ووقت الاستخدام بنطلعها تفك خالص وبعدين نضيف الملح والكمون والكزبرة الناشفة ولو حسيتيها تقيلة ومكتومة ممكن تزودي معلقتين تلاتة مية وتخفقيها كويس جداً بالمضري اليدوي دا اللي بيخليها هشة زي المطاعم

7. 7

   هنسخن طاسة زيت على نار متوسطة ونحط حبات الطعمية جنب بعض ومنقلبش خااالص الا لما تتحمر من تحت وبعدين نقلبها تتحمر من الجنب التاني وبألف هنا هتاكلو احلى طعمية بيتي مقرمشة وهشة واحلي من المطاعم كمان